Bu hava limanına HÜCUM - ÖLƏN VAR

Səudiyyə Ərəbistanının Dammam şəhərində yerləşən Kral Fəhd Beynəlxalq Hava Limanına oktyabrın 21-də axşam saatlarında hücum edilib. Hadisə nəticəsində bir nəfər ölüb, səkkiz nəfər yaralanıb.

Avtosfer.az xəbər verir ki, bu barədə ölkənin Mülki Aviasiya İdarəsi məlumat yayıb.

Məlumata görə, həlak olan şəxs Səudiyyə Ərəbistanında daimi yaşayan xarici vətəndaşdır. Yaralıların vəziyyəti və şəxsiyyətləri barədə ətraflı məlumat verilməyib. Hücum nəticəsində hava limanının infrastrukturuna da maddi ziyan dəyib.

“Associated Press” agentliyinin məlumatına görə, hava hərəkətini izləyən Flightradar24 xidməti sosial şəbəkədə təyyarələrin marşrutlarını dəyişdirdiyini və hava limanı ərazisindən yayındığını bildirib.

Səudiyyə Ərəbistanının hakimiyyət orqanları hücuma görə məsuliyyət daşıyan tərəfi müəyyənləşdirməyib. Hadisə zamanı hansı silahdan istifadə olunduğu da hələlik açıqlanmayıb.

Qeyd edək ki, Kral Fəhd Beynəlxalq Hava Limanı əvvəllər də Yəməndəki husi üsyançılarının Səudiyyə Ərəbistanının mülki hava limanlarına qarşı həyata keçirdiyi hücumlar fonunda zərbələrin hədəfi olub.