Təyyarə boyda iki asteroid Yer kürəsinin yanından keçir

Təyyarə böyüklüyündə iki asteroid - 2026 LD və 2026 KM3 - milyonlarla kilometr təhlükəsiz məsafədən Yer kürəsinin yanından keçir.

Avtosfer.az Oxu.az-a istinadən xəbər verir ki, bu barədə TOI məlumat yayıb.

Bildirilib ki, təxminən 52 metr diametrə malik (Boeing 737 təyyarəsinin gövdəsinə bərabər) ilk kosmik obyekt 1.14 milyon kilometr aralıdadır. Bu rəqəm Yerdən Aya qədər olan məsafəni üç dəfə üstələyir. Diametri təqribən 34 metr olan ikinci asteroid isə planetimizdən daha uzaq - 2.35 milyon kilometr məsafədə hərəkət edəcək.

Ölçülərinin təyyarələrlə müqayisə edilməsinə rəğmən, NASA və digər beynəlxalq kosmik agentliklərin ekspertləri planetimiz üçün hər hansı bir təhdid görmürlər. Toqquşma risklərini dəyərləndirən mövcud standartlara görə, bu tipli göy cisimləri tamamilə zərərsiz sayılır. Lakin məqalədə vurğulanır ki, asteroidlərin monitorinqi sadəcə formal xarakter daşımır. Hər bir yeni müşahidə uçuş orbitlərini daha yaxşı anlamağa, gələcək proqnozlarda yanlışlıqları minimuma endirməyə və qlobal planetar müdafiə mexanizmlərini inkişaf etdirməyə imkan yaradır.