Bu küçənin sakinlərinin yol dərdi illərdir ki, bitmir - VİDEO

Bu küçənin sakinləri yollarının yararsız vəziyyətdə olmasından şikayətçidirlər. Söhbət Qaradağ rayonu Qobustan qəsəbəsi 1-ci massiv küçəsindən gedir. Vətəndaşların sözlərinə görə kanalizasiya və yağış sularının arxına çevrilən ərazidə hərəkət etmək çox çətindir. Məsələyə aidiyyəti qurumlar münasibət bildiriblər. Bəs görəsən problem nə zaman həll ediləcək?

Qaradağ rayonu Qobustan qəsəbəsi 1-ci massiv adlanan küçənin sakinləri yol sarıdan əziyyət çəkirlər. Kanalizasiya sistemi olmadığından çirkab sular küçəyə axır. Yağış yağanda isə vəziyyət daha acınacaqlı olur. 

Sakinlərin sözlərinə görə yollar yararsız vəziyyətdə olduğundan uşaqlar məktəbə getməkdə çətinlik çəkirlər. Vətəndaşların iddiasına görə təcili tibbi yardım briqadaları da əraziyə gəlmək istəmirlər. 

Məsələ ilə bağlı Qaradağ rayonu, Qobustan bələdiyyəsinin rəis müavini Xuduş Ağayev qeyd edib ki, kanalizasiya sisteminin çəkilməsi, daha sonra yola asfalt qatının vurulması üçün sakinlər rəsmi qaydada quruma müraciət etməlidirlər. 

Rayon icra hakimiyyəti başçısının Qobustan qəsəbə İnzibati Ərazi Dairəsi üzrə nümayəndəsi İsa Gözəlov şifahi olaraq bildirdi ki, sözügedən problemlərin həll edilməsi üçün nə onlara, nə də bələdiyyə rəsmi müraciət edilib.