“İnsanlar daha çox uşaq sahibi olmasa, mədəniyyət çökəcək” - İlon Maskdan xəbərdarlıq

"Tesla” və "SpeysX” şirkətlərinin sahibi İlon Mask insan sayı ilə bağlı SOS siqnalı çalıb.

Sfera.az bildirir ki, "Wall Street Journal”ın illik CEO Şurasında çıxışı zamanı "kifayət qədər insan yoxdur” deyən iş adamı, doğum nisbətlərinin sürətlə azaldığını deyib. 

"Bu, bəşər sivilizasiyasını təhdid edə bilər. Əksəriyyət dünyada çox sayda insanın olduğunu və əhalinin nəzarətdən çıxdığını düşünür. Amma tam əksidir. Bunun üçün rəqəmlərə baxmaq kifayətdir. Əgər insanlar daha çox uşaq sahibi olmasa, mədəniyyət çökəcək”, - deyə Mask qeyd edib.

"Buna görə bu qədər çox uşağınız var?” sualını isə İlon belə cavablandırıb: 

"6 uşaq atası olaraq yaxşı nümunə olmağa çalışıram. Dünya Bankının statistik məlumatlarına görə, 1960-cı ildən bəri qlobal doğum nisbətləri davamlı olaraq azalır. ABŞ-ın Xəstəliklərə Nəzarət və Qarşısının Alınması Mərkəzi (CDC) də 2020-ci ildə ölkədə doğum nisbətinin 4 faiz azaldığını açıqlayıb və bu rəqəmlər qeydlər aparılmağa başladığı gündən bu yana, rekord həddə çatıb”.