Oğuz-Yevlax yolunun bir hissəsi bərbad vəziyyətdədir - VİDEO

Oğuz-Yevlax avtomagistralının Kərimli kəndindən başlayaraq Yaqublu kəndinə qədər olan 3 km-lik hissəsi bərbad vəziyyətdədir.

Yolun bəzi hissələrinə çınqıl döşənsə də, uzun müddət istismar olunaraq iri daşların üzə çıxması nəticəsində yol bu günə düşüb.

Yaxınlıqda olan 15-ə yaxın kəndin sakinləri bundan əziyyət çəkdiklərini deyirlər. Yolun bu vəziyyətdə olması isə ən çox sürücüləri çıxılmaz vəziyyətdə qoyur.

Problem ilə əlaqədar Avtomobil Yolları Dövlət Agentliyinin mətbuat katibi Anar Nəcəfli bildirdi ki, 31 km-lik Kərimli-Oğuz avtomobil yolunun Şəki rayonundan keçən 21 km-lik hissəsi əsaslı şəkildə yenidən qurulub. Yaqublu kəndinə düşən 2,5 km-lik hissə də daxil olmaqla, yolun Oğuz rayonundan keçən 10 km-lik hissəsinin qurulması məqsədilə layihə hazırlanıb və aidiyyəti üzrə təqdim edilib. Maliyyə vəsaiti ayrılan kimi yolun sözügedən hissəsi də yenidən qurulacaq.