Ramiz Mehdiyevlə bağlı yeni qərar olacaq

Dövlətçilik əleyhinə xüsusilə ağır cinayətlər törətməkdə ittiham olunan Prezident Administrasiyasının keçmiş rəhbəri Ramiz Mehdiyevin 4 aylıq ev dustaqlığı başa çatır.

Avtosfer.az qafqazinfo-ya istinadən xəbər verir ki, həmin müddət irihəcmli cinayət işi üzrə ibtidai istintaq tədbirləri üçün yetərli olmayıb.

Əlavə sübutların toplanılmasının zəruriliyi nəzərə alınaraq Dövlət Təhlükəsizliyi Xidmətinin (DTX) həmin qətimkan tədbirinin uzadılması ilə bağlı bu günlərdə məhkəməyə müraciət edəcəyi gözlənilir.

Qanunvericiliyə görə, xüsusilə ağır cinayət işləri üzrə ibtidai istintaq müddəti maksimum 19 aydır. Bu cinayət işi üzrə 4 aylıq ilkin müddət fevralın 14-ü başa çatır. Yeni təqdimat və vəsatətə Səbail Rayon Məhkəməsində baxılmalıdır.

Qeyd edək ki, Ramiz Mehdiyev dövlətə xəyanət, hakimiyyəti zorla ələ keçirməyə yönələn hərəkətlər və cinayət yolu ilə qazanılmış əmlakı leqallaşdırmaqda ittiham olunur. Ötən ilin 14 oktyabrında onun barəsində 4 aylıq ev dustaqlığı qətimkan tədbiri seçilib. Davam edən istintaqla eyni cinayətlə bağlı AXCP sədri Əli Kərimli, onun müavini Məmməd İbrahim və Ramiz Mehdiyevin yaxın adamı olmuş Eldar Əmirov da həbs edilib.

Hazırda DTX-nin İstintaq Baş İdarəsində ibtidai istintaq hərəkətləri aparılır. Cinayət işləri üzrə çoxsaylı şahidlərin dindirildiyi bildirilir.