Yanacaq qiyməti qalxdı: marşrut və taksi bahalaşa bilərmi?

Dizel və benzinin qiymətinin qalxması ictimai nəqliyyatda və taksi xidmətlərində dərhal tarif artımı olacağı anlamına gəlmir. Daşıyıcılar və operatorlar qiymətləri yüksəltmədən də artan xərcləri kompensasiya edə bilərlər. Bunun üçün effektiv idarəetmə, texnoloji həllər, yanacaq səmərəliliyinin artırılması və marşrutların optimallaşdırılması kimi alternativ yollar mövcuddur.

Avtosfer.az xəbər verir ki, bu sözləri Axar.az-a açıqlamasında nəqliyyat eksperti Eldəniz Cəfərov yanacaq qiymətlərindəki artımın mümkün təsirlərindən danışarkən deyib.

Xətaidə “Prius” sürücüsü qoçuluq edib yol kəsir – 77-TL-980 - VİDEO

“Rəqəmsal planlama sistemlərindən istifadə, hibrid və elektrik avtobusların tətbiqi uzunmüddətli perspektivdə yanacaq xərclərini əhəmiyyətli dərəcədə azalda bilər. Bu il ərzində ictimai nəqliyyatda avtobus seqmenti üzrə “brutto müqavilə” mexanizminin tətbiqi nəzərdə tutulur və artıq bununla bağlı hazırlıqlar gedir. Bu mexanizm çərçivəsində dövlət ictimai nəqliyyatı subsidiyalaşdıracaq.Məhz bu səbəbdən tariflərin kəskin şəkildə bahalaşacağını real hesab etmirəm”, - o bildirib.

Eldəniz Cəfərov qeyd edib ki, taksi qiymətləri onsuz da dinamik və dəyişən xarakter daşıyır:

“Tariflər sutkanın saatlarına, hava şəraitinə və tələbat səviyyəsinə görə formalaşır. Bu baxımdan yanacaq qiymətindəki artımın avtomatik olaraq taksi xidmətlərində bahalaşmaya səbəb olacağını demək düzgün deyil. Daşıyıcılar texnoloji yeniliklər və əlavə gəlir mənbələri hesabına xərcləri optimallaşdıraraq qiymət artımına getmədən fəaliyyətlərini davam etdirə bilərlər”.