Avtobusu "ikitəkər" sürən sürücü işdən qovuldu - FOTO

Bakıda daha bir sərnişin avtobusunun sürücüsü özbaşınalıq edərək, yol hərəkəti qaydalarını kobud şəkildə pozub. Bir sıra kütləvi informasiya vasitələrində avtobus sürücüsünün sərnişinlərin həyatı ilə necə risk etdiyini əks etdirən fotolar yayılıb. Yayılan fotoda göstərilir ki, 24 saylı sərnişin avtobusu içərisi dolu adamla birlikdə “şou” göstərir. Sürücü avtobusu yolun kənarında, hündür əraziyə qaldırıb. Beləliklə də, sürücü içərisi sərnişin dolu avtobusu "ikitəkər" sürür. Fotodan görünür ki, sürücü avtobusu elə vəziyyətdə sürür ki, maşın az qalır aşsın.

Məsələ ilə əlaqədar avtobusun sahibkarı ilə əlaqə saxladıq. Sahibkar Araz Mütəllibovun verdiyi məlumata görə, hadisə barədə məlumatı yoxdur. “Hazırda xəstəxanadayam. Bu barədə xəbərim yoxdur. Araşdıracağam və sürücü barədə tədbir görəcəyəm”, - deyə Araz Mütəllibov bildirib.

Məsələ ilə əlaqədar Nəqliyyat Nazirliyinin tabeliyində olan Bakı Sərnişinnəqliyyat Məhdud Məsuliyyəti Cəmiyyətinin sərnişindaşımaları monitorinqi, lisenziya və fərqlənmə nişanlarının cəlb etmə şöbəsinin müdiri Elçin Nəsirovun anspress-ə verdiyi məlumata görə, bu barədə artıq məlumatları var. “Mənə o fotonu göndəriblər. Hazırda həmin saatda avtobusu idarə edən sürücünün tapılması istiqamətində araşdırma aparılır. Sürücü xətdən kənarlaşdırılacaq və bir də avtobus idarə etməyə buraxılmayacaq”, - deyə Elçin Nəsirov bildirib.