Avtomobili addan-ada keçirmək qaydası belə olacaq - YENİLİK

Yol hərəkəti ilə bağlı bu gün qüvvəyə minən başqa bir maraqlı dəyişiklik avtomobillərin təkrar qeydiyyatı, yəni addan-ada keçirilməsi ilə bağlıdır. Bu dəyişiklikdən sonra Dövlət Yol Polisinin yalnız bir qeydiyyat-imtahan və texniki baxış məntəqəsində avtomobilin addan-ada keçirilməsini tam olaraq həyata keçirmək mümkündür. Bu dəyişiklik özgəninkiləşdirmə (alqı-satqı) prosesində tranzit nömrəni faktiki olaraq ləğv edir. İndiyədək belə idi. Məsələn, lənkəranlı bakılının avtomobilini almaq üçün əvvəlcə Bakıdakı qeydiyyat-imtahan və texniki baxış şöbəsinə getməli, orada avtomobil uçotdan çıxarılmalı, tranzit nömrə ilə Lənkərana getməli və orada qeydiyyata alınaraq daimi nömrə verilməli idi. Bu gündən isə bütün bu işi ya Bakıda, ya da Lənkəranda bircə dəfəyə qısa müddətdə həyata keçirmək mümkün olacaq və tranzit nömrəyə ehtiyac olmayacaq.

Avtosfer.az