Axır ki, bu yol düzələcək

Bir neçə ildir ki təmir işləri gedən və hələ də davam edən Ziya Bünyadov prospektində artıq asfalt-beton örtüyünün sonuncu üst qatının döşənməsinə başlanılıb. Avtosfer.az-ın məlumatına görə, yolda uzun müddətdirki sel sularının yığılıb, qalması nəticəsində yolun asfalt qatı sıradan çıxıb. Bunu nəzərə alaraq sözügedən ərazidə asfalt-beton qatının yenilənməsi işləri aparılır. Artıq sonuncu aşınma qatı vurulur. İşlərin sürətlə aparılması və yolun bütün eni boyu üst örtüyünün döşənməsi üçün eyni vaxtda 4 asfalt döşəyən maşınlar cəlb olunub.

“Azəryolservis” ASC-nin mətbuat xidmətinin rəhbəri Pünhan Mürsəliyevin sözlərinə görə, bu prospekt şimaldan girişi təmin edəcəyi üçün çox əhəmiyyətlidir. Həmçinin o prospektdə 4 piyada keçidinin olduğunu da dedi. Paralel olaraq səki daşlarının düzülməsi və işıq dirəklərinin quraşdırılması işləri də aparılır. Əgər hava şəraiti imkan verərəsə, o zaman asfalt-beton örtüyünün üst qatının döşənməsi işlərinin təxminən 10 gün müddətində yekunlaşması gözlənilir. Prospektdə isə bütün işlərin tam olaraq, bu ilin noyabr ayının ilk 10 günlüyünə qurtarması planlaşdırılır.

Emin