Bakıda avtomobilləri «zaryadkaya» qoymaq üçün yerlər açılıb

“SOCAR Petroleum” Qapalı Səhmdar Cəmiyyəti (QSC) öz yanacaqdoldurma məntəqələrində elektriklə işləyən və ya elektrik şarjı üçün girişi olan hibrid avtomobillərin sahiblərinə yeni xidmətlər təklif edir. Avtosfer.az faa.az-a istinadən xəbər verir ki, “SOCAR Petroleum” QSC-dən verilən məlumata görə, belə avtomobilləri Bakı-Aeroport yolu üzərində, Sabunçu və Suraxanı yol qovşaqlarının yaxınlığında yerləşən yanacaqdoldurma məntəqələrində ultrasürətli avadanlıqlar vasitəsilə 15-20 dəqiqəyə tam şarj etmək mümkün olacaq. Quraşdırılan yeni avadanlıqlar “CHAdeMO”, “COMBO 2”, “AC TYPE mode2” standartlarını dəstəkləyir. Bu avadanlıqlar eyni anda iki avtomobili şarj edə biləcək texnologiya ilə təmin olunub. Məlumatda həmçinin bildirilir ki, ultrasürətli şarj avadanlıqlarının quraşdırılması respublikamızda bu tip nəqliyyat vasitələrinə marağın artmasına səbəb olacaqdır. Əsas məqsədlərindən biri ətraf mühitin qorunması olan “SOCAR Petroleum” atmosferə atılan zərərli qazların miqdarının minimuma endirilməsinə imkan verən müasir texnologiyaların tətbiqini bundan sonra da davam edəcək.