Bakı-Sumqayıt yolunda YENİLİK - Buna əməl etməyənlər CƏRİMƏLƏNƏCƏK!

Ümumi istifadədə olan nəqliyyat vasitələri üçün xüsusi hərəkət zolaqlarının təşkili ilə bağlı tədbirlər davam etdirilir. Məlumata görə, ümumi istifadədə olan nəqliyyat vasitələri üçün xüsusi hərəkət zolaqlarının təşkili ilə bağlı tədbirlər davam etdirilir. Sumqayıt şəhərindən Bakı şəhəri istiqamətində təşkil edilmiş avtobus zolağının effektivliyi nəzərə alınaraq, eyni zamanda görülən işlərin davamı olaraq əks istiqamətdə də xüsusi hərəkət zolağının təşkili həyata keçirilir.

Həmin yol sahəsində avtobus zolağının tələbinə uyğun nişanlanma xətləri çəkilir və müvafiq yol nişanları quraşdırılır.

Bəs həmin avtobus zolağı yoldakı sıxlığın qarşısını nə dərəcədə alacaq və avtobus zolağına girən sürücülər neçə manat məbləğində cərimələnəcək?

Məsələ ilə bağlı danışan Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli referans.az-a bildirib ki, həmin yolda avtobus zolağının çəkilməsi yoldakı sıxlığın qarşısının alınması məqsədini daşıyır:

“Avtobus zolaqları mövcud yol infrastrukturunda salınıb. Paytaxtımızda avtomobilləşmə kifayət qədər sürətlə gedir və bu proses yenə də davam edir. Sözügedən yolda da sıxlıqların yaranması mümkündür. Demək olmaz sıxlıq yaranmayacaq. Amma o sıxlıqların ümumilikdə qarşısını təməlli şəkildə almaq üçün müəssər və kifayət qədər vətəndaşlarımızın nəqliyyat ehtiyaclarını ödəyən ictimai nəqliyyat da olmalıdır ki, bu sıxlıqlar artan tendensiya ilə davam etməsin. İctimai nəqliyyatın inkişafı üçün onun hərəkət etdiyi yolların əlçatan olması vacibdir. Bu baxımdan da bilirik ki, çətin prosesdir, amma nəqliyyat sahəsinin də inkişafı olmadan gələcəkdə sıxlıqların qarşısını ala bilmərik”.

DYP rəsmisi bildirib ki, bu gün şəxsi minik nəqliyyat vasitələrindən imtina etməyin ən gözəl yolu ictimai nəqliyyata üstünlük verməkdir. Onun sözlərinə görə, ictimai nəqliyyat elə olmalıdır ki, insanlar şəxsi minik nəqliyyat vasitələrindən imtina etsinlər: “Hesab edirik ki, məsələlər öz yoluna düşəcək. Nəinki avtobus zolaqları daha fərqli nəqliyyat vasitələrinin də olması bu prosesi sürətləndirə bilər. Həmişə işin əvvəlində müəyyən çətinliklər yarana bilər, amma həmin çətinliklərin aradan qaldırılması üçün aidiyyatı qurumlar tərəfindən bütün lazımi addımlar atılır”.

Avtobus zolaqları ümumilikdə İnzibati Xətalar Məcəlləsinin 327-ci maddəsinin 1-ci bəndinə uyğun olaraq nişanın tələbinin pozulduğu halda, həmin zolağa təyinatı üzrə nəzərdə tutulmayan və daxil olan nəqliyyat vasitələri üçün 40 manat cərimə nəzərdə tutulub – deyə Araz Əsgərli əlavə edib.

Bu barədə danışan nəqliyyat eksperti Elməddin Muradlı hesab edir ki, sıxlığın qarşısının alınması üçün ictimai nəqliyyatı inkişaf etdirmək lazımdır:

“İctimai nəqliyyat da digər nəqliyyat vasitələri ilə eyni sırada tıxacda qalırsa, o zaman yenə də vətəndaşlar şəxsi avtomobili üstün tuturlar. Bütün dünyada təcrübədən keçirilmiş bu üsul o deməkdir ki, ictimai nəqliyyata nə qədər üstünlük verilsə və şərait yaradılsa, insanlar bir o qədər buna üstünlük verəcək. Bunun da əsas şərtlərindən biri avtobuslar üçün xüsusi zolaqların yaradılmasıdır ki, sərnişinlər mənzil başına rahat çatdıqlarını düşünüb artıq manatlıq taksilərə, şəxsi maşınlara və ya digər nəqliyyat vasitələrinə üstünlük verməsinlər”.

Elməddin Muradlı qeyd edib ki, Bakı get-gedə genişlənir və genişlənmənin ən çox müşahidə olunduğu ərazi Lökbatan, Qaradağ, Binəqədi və Abşeron rayonlarıdır. Onun sözlərinə görə, həmin ərazidə torpaq sahələri ucuz olduğuna görə orta və kasıb təbəqə oradan ev ala bilir və buna görə də həmin ərazilərdə getdikcə sıxlıq artır: “Sözügedən ərazilərə metro xəttlərinin çəkilməsi də sıxlığı aradan qaldıra bilər. İllərdir deyirik, amma bir nəticəsi olmur. Xocaəsən stansiyasını sınaqdan keçirdilər və uğurlu oldu. İsətəsələr Xırdalana da, Sulutəpəyə də və digər ərazilərə də çəkə bilərlər, yetər ki istək olsun”.