Sükan arxasında telefondan istifadə etməyin! - DYP-dən XƏBƏRDARLIQ

Baş Dövlət Yol Polisi İdarəsi (BDYPİ) yol hərəkəti iştirakçılarına mobil telefondan istifadə ilə bağlı xəbərdarlıq edib.

Müasir dövrdə mobil telefon gündəlik həyatın ayrılmaz hissəsinə çevrilsə də, yol hərəkəti zamanı ondan diqqətsiz istifadə ciddi təhlükələrə səbəb ola bilər. Xüsusilə sükan arxasında telefona yönələn diqqət sürücünün ətrafda baş verənləri vaxtında görməsinə və yaranan təhlükəni düzgün qiymətləndirməsinə mane olur.

BDYPİ bildirir ki, avtomobil idarə edərkən mobil telefondan istifadə sürücünün diqqətini yayındırır, reaksiyasını ləngidir, nəqliyyat vasitəsinə nəzarəti zəiflədir və qəfil yaranan təhlükəyə gec reaksiya verməsinə səbəb ola bilər.

İdarə sürücüləri sükan arxasında mobil telefondan istifadə etməməyə, diqqətlərini yalnız yola və nəqliyyat vasitəsinin təhlükəsiz idarə olunmasına yönəltməyə çağırıb.

Müraciətdə piyadalara da xəbərdarlıq edilib. Qeyd olunub ki, piyadalar yolu müəyyən edilmiş keçidlərdən keçərkən mobil telefondan mümkün qədər az istifadə etməli, diqqətlərini yol şəraitinə və yaxınlaşan nəqliyyat vasitələrinə yönəltməlidirlər.

BDYPİ yol hərəkəti iştirakçılarına bir daha diqqətli olmağı tövsiyə edib.

Unutmayın: Yolda bir anlıq diqqətsizlik geri dönüşü olmayan nəticələrə səbəb ola bilər.