Xaçmazda “avtoş”luq edərkən qəza törədən sürücü vəsiqədən məhrum edildi - RƏSMİ - VİDEO

Xaçmazda yol hərəkəti qaydalarını kobud şəkildə pozan sürücü özünü videoya çəkərək sosial şəbəkə hesabında paylaşıb.

Avtosfer.az-ın məlumatına görə, 02-BO-743 dövlət nömrə nişanlı “VAZ-2106” markalı avtomobilin sürücüsü yolda sərt manevrlər edib. Müxtəlif vaxtlarda qeydə alınmış görüntülərdə əl əyləcindən istifadə edən sürücü avtomobili fırladaraq yolda drift edib. Həmçinin o, nəqliyyat vasitəsini qəflətən sürətləndirməklə təkərlərini asfalt örtüyünə sürtərək səs çıxarıb. Sürücü törətdiyi xətadan sonra qəza etməsiylə bağlı paylaşım edib. Digər görüntüdə o, yenidən təhlükəli manevrlər edərək qarşı tərəfdən gələn avtomobilə qəza təhlükəsi yaradıb.

DİN Mətbuat Xidmətinin Quba regional qrupunun baş inspektoru, polis baş leytenantı Xəyal Talıbov Avtosfer.az-a bildirib ki, rayon ərazisində hərəkətdə olarkən avtoxuliqanlıq edən “VAZ 2106” markalı avtomobilin sürücüsü Elgün Hacıyev Xaçmaz rayon Dövlət Yol Polisi Şöbəsinin əməkdaşları tərəfindən saxlanılıb.

E.Hacıyev barəsində protokol tərtib olunaraq baxılması üçün rayon məhkəməsinə göndərilib. Məhkəmənin qərarı ilə o, cərimə olunub və sürücülük hüququndan 1 il müddətinə məhrum edilib.

Nərmin