Yol polisi yollardakı vəziyyətlə bağlı sürücülərə xəbərdarlıq etdi - DİQQƏT!

Baş Dövlət Yol Polisi İdarəsi həftəsonu yollarda müşahidə olunan vəziyyətlə bağlı sürücülərə müraciət edib.

Avtosfer.az xəbər verir ki, həftəsonları paytaxtla bölgələr arasında hərəkət intensivliyi əhəmiyyətli dərəcədə artır. Səfərlərin çoxalması xüsusilə avtomagistrallarda nəqliyyat sıxlığına səbəb olur ki, bu da yol-nəqliyyat hadisələrinin başvermə riskini yüksəldir.

Məlumata görə, hərəkətin təhlükəsizliyini təmin etmək məqsədilə respublika ərazisində nəzarət-profilaktik tədbirlər daha da gücləndirilib.

Qeyd olunub ki, bəzi hallarda sürücülərin yol hərəkəti qaydalarına əməl etməməsi, texniki nasazlıq, tələskənlik və diqqətsizlik ağır qəzalarla nəticələnir.

Baş Dövlət Yol Polisi İdarəsi sürücülərə tövsiyə edir ki:

• Səfərə çıxmazdan əvvəl nəqliyyat vasitəsinin texniki sazlığını yoxlasınlar;
• Nasaz avtomobillə yola çıxmasınlar;
• Sürət həddinə və ötmə-manevretmə qaydalarına ciddi riayət etsinlər;
• Yağmurlu hava şəraitini və yolun real vəziyyətini nəzərə alsınlar;
• Uzaq məsafələrə səfər zamanı fasilələr versinlər;
• Yorğun və yuxusuz halda sükan arxasına əyləşməsinlər.

Sonda vurğulanır ki, yolda intizam və məsuliyyət hər bir sürücünün təhlükəsizliyinin əsas təminatıdır.