Avtomobil satışı şirkətinin vəzifəli şəxsinə cinayət işi açıldı

Azərbaycanda vətəndaşa vurulmuş ziyan istintaq dövründə ödənilib. Bu barədə Avtosfer.az-a Baş Prokurorluğun mətbuat xidmətindən bildirilib. Məlumata görə, Baş prokuror yanında Korrupsiyaya qarşı Mübarizə Baş İdarəsində «Grand Motors» MMC-nin vəzifəli şəxsi tərəfindən yol verilmiş qanun pozuntuları ilə bağlı başlanmış cinayət işinin istintaqı yekunlaşıb. İstintaq zamanı cəmiyyətin vəzifəli şəxsi Samir İbadullayevin qulluq mövqeyindən sui-istifadə etməklə Bakı şəhər sakininin “Grand Motors” MMC-dən lizinq yolu ilə aldığı avtomaşınlara görə 176 min 450 manat məbləğində ödədiyi vəsaitin 120 min 150 manatını sonuncunun adına cəmiyyətin mühasibatlığında açılmış hesaba mədaxilə etməyərək ələ keçirməsində şübhəli bilindiyindən ona qarşı Cinayət Məcəlləsinin 178.3.2-ci (dələduzluq) maddəsi ilə ittiham elan edilib. İstintaq dövründə dəymiş ziyanın tam məbləğdə ödətdirilməsi təmin olunub. Cinayət işi baxılması üçün Bakı Ağır Cinayətlər Məhkəməsinə göndərilib.

Emin