Bu maşın 100 km-ə 1 manat 25 qəpik sərf edir

Bakıya ilk “Tesla” elektromobili may ayında gətirililəcək. Avtosfer.az xəbər verir ki, bu barədə fins.az-a “Tesla Club Baku” şirkətindən bildirilib. Xatırladaq ki, şirkətə  fevral ayında  ilkin olaraq  1 ədəd “Tesla Model S” avtomobili  sifariş edilsə də, Azərbaycanda dolların kəskin bahalaşması avtomobil gətirilməsini  gecikdirib.  Əsas səbəblərdən biri dolların bahalaşması olub.   Şirkətdən verilən məlumata görə, bu avtomobillər qiyməti  manatla 20-25 % artıb.

Belə ki, 2014-cü il model “Tesla Model S” avtomobilin bazar qiyməti  85 min dollardır. Bu məbləğ əvvəl 66 min manata bərabər olduğu halda, indi yeni məzənnə ilə 89 min manatdır. Bu isə o deməkdir ki, gömrük və digər xərclər nəzərə alınandan sonra avtomobilin Azərbaycanda  yeni satış qiyməti  120 -125 min manat  olacaq.

Elektrik enerjisi ilə işlən bu elektromobillər xeyli baha olsa da, komfortlu, keyfiyyətli və qənaətcil olması ilə seçilir. Elektriklə işləməsi isə onu avtomobil sahibləri üçün sərfəli edir.

Azərbaycandakı enerji qiymətləri ilə “Tesla”nın bir dəfə enerji yığması 5 manata başa gəlir. Bu enerji ilə elektromobil  400 kilometr məsafə qət edə bilir. Bu isə 100 kilometr üçün enerji xərclərinin cəmi 1,25 manat olması deməkdir. Müqayisə üçün bildirək ki, hazırda ölkədə istismar edilən avtomobillər arasında ən qənaətli modellərdə belə, 100 kilometrlik məsafəyə 3,5-4 manatlıq yanacaq sərf edilir. Başqa sözlə, yanacaq baxımından “Tesla”da gəzmək ənənəvi avtomobillərdən 3-4 dəfə ucuz başa gəlir.