Saatda 700 km sürət toplayan motosiklet - VİDEO

Avtosfer.az xəbər verir ki, Böyük britaniyalı mühəndislər dünyanın ən sürətli motosikletini istehsal edib. İki təkərli nəqliyyat vasitəsi döyüş təyyarəsi mühərriki ilə hərəkətə gəldiyindən, saatda azı 700 kilometr sürət toplaya bilir. Hibrid raket mühərrikinin motosikletə uyğunlaşdırılması az vaxt aparmayıb. İllərdir bu motosiklet üzərində işləyən Riçard Braun və həmkarları sonda istədikləri nəqliyyat vasitəsini ərsəyə gətirə biliblər. İndi britaniyalı mühəndislər mayın 22-də bu raket sürətli motosikletlə dünya rekordu vurmağa hazırlaşır. Onlar adlarını tarixə yazdırmaq üçün saatda ən azı 720 kilometr sürətlə hərəkət etməyi planlaşdırırlar.

Ümumiyyətlə Riçard uzun illərdir ki, Gines Rekordlar Kitabına həvəs salıb. 1999-cu ildə motosikletlə saatda 584 kilometr sürət yığsa da, rekordun bir addımlığında uğursuzluğa düçar olmuşdu. Buna səbəb, motosikletin  təkərlərindən birinin yüksək sürtünmə qüvvəsinə davam gətirməyərək alışması idi. Bu dəfə isə, Riçard Braun acı təcrübədən dərs çıxardığını vurğulayır.

Qeyd edək ki, ən yüksək sürətli motosiklet rekordu Amerikalı Roki Robinsona məxsusdur. Bu şəxs,  5 il əvvəl  motosikletlə  saatda 606 kilometr sürət yığa bilmişdi.