Azərbaycanda avtomobillərin kirayəyə verilməsi ilə məşğul olan çoxlu sayda şirkət fəaliyyət göstərir. Bu şirkətlər gündəlik sürmək, həm bölgələrə getmək, həm də əlamətdar günlərdə, xüsusilə də toy-nişan mərasimlərində istifadə etmək üçün avtomobilləri kirayəyə verir.

Avtosfer.az-ın məlumatına görə, şirkətlərin kataloqlarında qənaətcil maşınlardan tutmuş, ən bahalı modellərə qədər müxtəlif avtomobil və avtobuslara rast gəlinir. Daha lüks avtomobillərin kirayəsi də daha baha qiymətə olur. Son on ildə belə şirkətlərin bazar payı xeyli artsa da, ötən ildən pandemiya ilə bağlı tətbiq edilən karantin məhdudiyyətləri onların da işlərində dəyişiklik yaradıb.

Nəqliyyat sahəsi üzrə ekspert Eldəniz Cəfərov “Report”a açıqlamasında turizm sektorundakı geriləmənin avtomobil kirayəsi bazarına da təsirindən danışıb: “Azərbaycanda turizm bumu başlayandan sonra “rent a car” şirkətlərinin sayı getdikcə artmağa başladı. Pandemiyaya qədərki dövrdə bu şirkətlərə böyük ehtiyac var idi. Həm daxili, həm xarici turistlər kirayə avtomobillərdən fəal istifadə edirdi. Pandemiya başladığı dövrdə isə xarici turizmdə xeyli zəifləmə oldu. Bu da avtomobil kirayəsi bazarına da təsir göstərdi”.

E.Cəfərovun sözlərinə görə, pandemiyadan sonra “rent a car” şirkətlərinin gəlirləri xeyli azalıb: “Bu gün Azərbaycanın avtomobil kirayəsi şirkətlərinin vəziyyəti o qədər də ürəkaçan deyil və gəlirləri 70 %-ə qədər azalıb. Ümid edirik ki, bu yaydan onların da fəaliyyəti fəallaşar. Bu gün bazarda mühərrik həcmi kiçik avtomobillərin və 7-11 nəfərlik avtobusların kirayəsinə tələbat daha çoxdur.

Ekspert avtomobil kirayəsi qiymətlərinin yayda artdığını qeyd edib:

“Kirayə qiymətləri mövsümi olaraq dəyişir. Yay aylarında qiymətlər artır, qış, yaz və payız aylarında isə stabil olur. Bu gün Azərbaycanda avtomobillərin kirayə qiymətləri o qədər də yüksək deyil”.

“Azərbaycandakı “rent a car” şirkətlərinin bir çoxu öz işlərini beynəlxalq səviyyədə qurur. Hətta beynəlxalq avtomobil kirayəsi şirkətləri də artıq Azərbaycanda fəaliyyət göstərir. Onlar həm onlayn qaydada, həm mobil tətbiq vasitəsilə, həm də bir başa kontaktla işləyirlər”, - deyə E.Cəfərov bildirib.

Paytaxtdakı “rent a car” şirkətlərindən birinin nümayəndəsi Orxan Bünyadzadə də işlərinin zəiflədiyini qeyd edib: “Turist yoxdur deyə işimiz zəifləyib. Əvvəlki illərlə müqayisədə bazarda vəziyyət zəifdir. Toyların açılması bazara elə də güclü təsir göstərməyib. Bölgələrə gediş-gəliş açılsa da, paytaxtdan kənara getmək üçün müraciətlər əsasən bayram günlərində olur. Həftə içi isə avtomobil kirayələyən çox olmur. Bizim əsas müştərilərimiz turistlər olurdu. İndi isə ölkəyə demək olar ki, turist gəlmir. İndiki şəraitdə şirkətin mövcudluğunu qoruyub saxlamağa çalışırıq.

Müsahibimiz bildirib ki, qənaətcil avtomobillərin kirayəsinə tələbat digərlərindən çoxdur:

“İnsanlar əsasən ekonom maşınlara üstünlük verir. Məsələn, “Chevrolet Aveo” modellərinə tələbat var. Onların üç günlük icarə qiymətləri 50-80 manat arasında dəyişir. Əvvəllər qiymət məsafədən asılı olaraq dəyişirdi, indi isə belə deyil”.