Bahalı restoranların qarşısında bahalı maşınlarla yolu kəsdilər; zolaq tutuldu - FOTO

Xocalı prospekti ilə bağlı bir neçə ay əvvəl yaranan mübahisələr bu gün artıq səngiyib. Ona görə ki, prospektin Ali Məhkəmənin yanından başlayan hissəsindən etibarən avtobus zolağı ləğv edildi. Yalnız sol zolaqda velosiped zolağı salındı. Lakin qeyd edilən ərazidə artıq yeni problemlər ortaya çıxır.

Avtosfer.az xəbər verir ki, Xətai rayonu Xocalı prospektində bəzi sürücülər avtomobillərini hərəkətə maneə yaradacaq şəkildə parklayır.

Belə ki, Ali Məhkəmənin prospektə tərəf olan hissəsindən etibarən yaradılan yol çiynini sürücülərin parklaması üçün ayırmışdılar. Lakin bu parklama yola parallel olmalı idi.

Bu gün artıq həmin parklama yerlərində “Pakhlava” restoranının sahibləri və müştəriləri yola perpendikulyar şəkildə maşınlarını saxlayır. 77-AJ-459, 10-RO-002 və 77-GU-077 qeydiyyat nömrəli müvafiq olaraq, “Toyota”, “Range Rover” və “Porsche” markalı avtomobillər dayanma-durma qaydalarını kobud şəkildə pozublar.

Əvvəllər Azərbaycan Yerüstü Nəqliyyat Nazirliyinin sürücülərə cəmi bir zolaqda hərəkət üçün şərait yaratdığını bağıran, videolar çəkib hay-küy salan şəxslər var idi. Bu gün isə belə bahalı avtomobillərin qaydaları pozması, yenidən hərəkət üçün bir zolağın qalmasını qışqıran şəxslərin videolarına rast gəlinmir.

Səfər