Bakıda qəza törədən sürücü yoxa çıxdı - FOTO

Bakıda yol-nəqliyyat hadisəsi törədən sürücü ziyan vurduğu şəxsə dəymiş zərəri ödəmədən yoxa çıxıb. Bu barədə Avtosfer.az-a 90-MZ-921 dövlət nömrə nişanlı, “Toyota Camry” markalı avtomobilin sürücüsü Şamxal Hüseynli məlumat verərək bildirib ki, 7 May tarixində Nərimanov rayonu 5 nömrəli xəstəxananın qarşısında qəza keçirib. “Toyota Prius” markalı, 99-UF-318 nömrəli avtomobil onun maşını ilə toqquşub. Sürücülər öz aralarında razılığa gələrək hadisə yerindən uzaqlaşıblar. Zərər vuran sürücü şəxsiyyət vəsiqəsini girov qoyaraq dəymiş zərəri ödəyəcəyini bildirsə də, sonradan zərərçəkmiş sürücünün mobil nömrəsini bloka ataraq yoxa çıxıb. Zərərçəkən Şamxal Hüseynli bildirir ki, avtomobilinə təxminən 150 manat dəyərində ziyan dəyib. Hadisəni törədən şəxsin etdiyi bu hərəkət heç bir çərçivəyə sığmır. Ona görə də vətəndaş aidiyyatı qurumlardan xahiş edir ki, zərərverən sürücü tapılsın və barəsində tədbir görülsün. 
 

Nərminə Əli