Sabirabadda avtomobil oğurlanıb. Bu barədə lent.az-a vətəndaş Pərviz Məmmədov məlumat verib. Onun sözlərinə görə, hadisə fevralın 4-dən 5-ə keçən gecə Sabirabad şəhəri Heydər Əliyev prospektində qeydə alınıb. Şikayətçi bildirib ki, göstərilən tarixdə naməlum şəxs və ya şəxslər atası Yaqub Hüseyn oğlu Məmmədovun adına olan “Vaz-21099” markalı 10-HX-450 dövlət qeydiyyat nişanlı avtomobil yaşadıqları binanın həyətindən qaçırılıb. P. Məmmədov bildirib ki, hadisə ilə bağlı polisə məlumat verilib.

Lakin bu qədər müddət keçsə də, hələ ki, avtomobil tapılmayıb.

Faktla bağlı Daxili İşlər Nazirliyinin mətbuat xidmətinin Şirvan regional qrupunun baş inspektoru, polis baş leytenantı Nizam Həmidov bildirib ki, hazırda avtomobilin tapılması istiqamətində axtarışlar davam edir: “Sabirabad rayon sakini P.Məmmədov fevral ayının 5-də rayon Polis Şöbəsinə ərizə ilə müraciət edərək atası Y.Məmmədova məxsus "VAZ 21099" markalı avtomobilin naməlum şəraitdə qaçırılması barədə məlumat verib. 

Daxil olmuş müraciətlə əlaqədar rayon Polis Şöbəsinin İstintaq Bölməsində cinayət işi açılıb, araşdırmalar aparılır. Nəqliyyat vasitəsinin tapılması, eləcə də həmin cinayət əməlini törədənin məsuliyyətə cəlb edilməsi istiqamətində istintaq-əməliyyat tədbirləri davam etdirilir”.