Ayıq sürücüyə görə maşını duracağa qoyulan sürücü nə etməlidir? - AÇIQLAMA

Sərxoş vəziyyətdə sükan arxasına əyləşməyin qadağan olduğunu hər birimiz bilirik. Spirtli içki qəbul etdikdən sonra ayıq sürücü xidmətinə müraciət edən məsuliyyətli sürücülər az deyil. Lakin bəzi hallarda ayıq sürücü avtomobil sahibinə problem yaradır. Dəfələrlə ayıq sürücülərin özləri sərxoş vəziyyətdə olur, yaxud sürücülük vəsiqəsi olmadan “xidmət” göstərirlər. DYP əməkdaşı ayıq sürücünün idarə etdiyi avtomobili saxladıqda və yuxarıda qeyd olunan problemləri aşkarladıqda nə baş verir?

Avosfer.az-a müraciət edən sürücü analoji problemlə üzləşib. Onun avtomobilini idarə edən ayıq sürücünün sürücülük hüququ məhdudlaşdırılıb. Nəticədə protokol tərtib olunub və maşın duracağa yerləşdirilib.  Lakin problemin böyüyü avtomobilin sahibi üçün yaranıb. Hazırda vətəndaş ayıq sürücünün səhvinə görə öz avtomobilini istifadə edə bilmir. Bəs belə hallarda sürücülər nə etməlidirlər?

Məsələ ilə bağlı Avtosfer.az-a açıqlama verən hüquqşünas Ərşad Hüseynov bildirib ki, ayıq sürücü xidmətindən istifadə edən şəxslər belə problem yaşamamaq üçün diqqətli olmalıdırlar:

“Sürücülər ilk növbədə mötəbər və etibarlı ayıq sürücü xidmətlərindən istifadə etməlidir. Ayıq sürücü göndərildikdə çəkinmədən həmin şəxsin sürücülük vəsiqəsini tələb edib,  etibarlılıq tarixi də daxil olmaqla vəsiqəni yoxlamalıdır”.

Hüquqşünas ayıq sürücünün sürücülük hüququ məhdudlaşdırıldığını və vəsiqəni təhvil vermədiyi hallarda xidmətdən istifadə edən şəxsin nələr etməli olduğuna da aydınlıq gətirib:

“Yol polisinin yoxlanışı zamanı belə vəziyyətə düşən avtomobil sahibləri ən qısa müddətdə - yəni protokol yazılana qədər olan vaxt ərzində başqa sürücü tapıb, avtomobili cərimə meydançasına aparılmadan götürməlidir. Nəzəri cəhətdən yol polisi də buna şərait yarada bilər. Əgər bu alınmasa avtomobil cərimə meydançasına yerləşdiriləcək. Maşının sahibi istəsə sürücülük hüququ olan birinə müraciət edib, avtomobilini təhvil ala bilər. Bu da alınmasa spirtli içkinin təsiri keçdikdən sonra özü gəlib, avtomobilini geri alacaq.”

Hüquqşünas bildirib ki, qeyd olunan hallarda avtomobil dərhal sahibinə təhvil verilməlidir.

Məhəbbət Tərlanoğlu