“Parkovşik”ə pul vermədiyi üçün maşınının təkərini deşdilər - VİDEO

Avtomobilinə maddi ziyan vurulan sürücünün videosu sosial şəbəkələrdə geniş yayılıb.

Avtosfer.az-ın məlumatına görə, hadisə bir müddət əvvəl paytaxtın mərkəzi küçələrindən birində baş verib.

Sürücünün iddiasına görə, o, “parkovşik”ə pul vermədiyi üçün avtomobilinin təkəri bıçaqla deşilib. “Avtomobilimi park etdikdən sonra “parkovşik” mənə yaxınlaşaraq pul verməyimi istədi. Mən isə üzərimdə xırda pulun olmadığını və qayıdarkən verə biləcəyimi bildirdim. Bir saat sonra əraziyə qayıdanda Arif adlı həmin şəxsin maşınım ön hissəsində dayanmışdı. Daha sonra o köşkə tərəf getdi. Öncə heç nə başa düşməsəm də, avtomobilimə yaxınlaşarkən təkərinin bir neçə yerdən bıçaqla deşilmiş olduğunu gördüm”.

Zərərçəkmiş köşkə yaxınlaşaraq “parkovşikin” harada olduğunu soruşsa da, qadın (Arifin həyat yoldaşı) onu görmədiyini deyib. Sürücü ərazinin qanunsuz parkinq zonası kimi istifadə olunduğunu və hər gün “parkovşik”lərdən 25 manat pul yığıldığını iddia edib.

Qeyd edək ki, avqustun 7-dən etibarən Azərbaycan Yerüstü Nəqliyyat Agentliyi (AYNA) tərəfindən "Azparking" mobil tətbiqi istifadəyə verilib. Nəqliyyat vasitələrinin parklanmasına görə nəzərdə tutulan ödənişlərin yığımı yalnız nağdsız qaydada həyata keçirilir. Ödənişlər mobil tətbiq və SMS ödəmə vasitəsilə edilir.

Nərmin Əkbər