SOCAR-dan qazsız məhəllə sakinlərinə: "Gözləmək istəmirlərsə özləri çəkə bilərlər"

Bakının Sabunçu rayonu Kürdaxanı qəsəbəsində yerləşən Teymur Adıgözəlov küçəsinin sakinləri tərəfindən saytın "Qaynar xətt"inə çoxsaylı şikayətlər daxil olub. Avtosfer.az xəbər verir ki, vətəndaşlar küçədə qaz xəttinin olmadığını iddia edirlər.  
Şikayətçi Azər Quliyevin sözlərinə görə, problemlə bağlı bir neçə dəfə "Azəriqaz" ASC-yə müraciət olunub. Lakin problemin həlli ilə bağlı heç bir dəyişiklik müşahidə olunmur. 
Şikayəti əlimizdə əsas tutaraq SOCAR Azəriqaz İstehsalat Birliyinin şöbə rəisi Eldəniz Vəliyevə müraciət etdik. Eldəniz Vəliyev sözügedən ərazidən məlumatlarının olduğunu bildirdi. Onun sözlərinə görə, 6-7 yeni fərdi yaşayış evindən ibarət olan bu məhəllənin növbəti mərhələlərdə qazlaşdırılması gündəmdədir. Lakin 2024-cü ilin qazlaşma siyahisina daxil deyil, növbəti mərhələ üçün nəzərdə tutulub. 
"Bəs sakinlər necə qaz əldə etsinlər?" sualına şöbə rəisinin cavabı belə oldu: "Sakinlər növbəti mərhələni gözləmək istəmirlərsə, xüsusi lisenziyası olan fərdi şirkətlərə müraciət edib, öz fərdi yaşayış evlərini qazla təmin edə bilərlər".

Nurlan Sakitoğlu