“Tıxaclar insanların cərimə ödəməsi, töhmət alması ilə nəticələnir” - DEPUTAT

“Bakı şəhərində fəlakətli vəziyyət yaranıb. Narahat edici məqamlardan biri də heç kimə tıxaca görə işə gecikməsi üçün hansısa bir imtiyaz nəzərdə tutulmayıb.”

Bunu Avtosfer.az-a açıqlamasında deputat Fazil Mustafa deyib. Onun sözlərinə görə, paytaxtda tıxaclar sürücülər üçün ciddi problemlərdən biridir və həlli istiqamətində atılan addımların hələki effekti yoxdur. “Minlərlə insan işə gecikir ki, bu da hansısa formada cərimə ödəməsi və ya işdən töhmət alması ilə nəticələnir. Heç kim bunu güzəştli bir variant kimi düşünmür. Hətta metro ilə hərəkət edən insanlar belə bəzən saatlarla metroya girə bilmirlər”.

Deputat qeyd edib ki, vətəndaşların işə gəlmə və işdən çıxma vaxtları məsələsində böyük problem var:

“İctimai nəqliyatda da yerüstü nəqliyyat vasitələri avtobus, yeraltı nəqliyyat vasitəsi isə metrodur. Başqa bir alternativ yoxdur. Qatar yolu isə tıxac problemini həll edə biləcək mahiyyətdə deyil. Hətta bir sıra qatar stansiyaları əsas yaşayış məntəqələrindən uzaqda yerləşir. Bu səbəbdən ora çatmaq özü də bir problemdir”.

Təəssüf ki, vətəndaşlar kimi Bakının tıxac problemi də elə “tıxac”da qalıb.

Məhəbbət Tərlanoğlu