"Volkswagen"in zərəri 6 milyard dollara çatıb

Almaniyanın avtomobil istehsalçısı "Volkswagen" (VW) qrupu bu ilin üçüncü rübündə 5,9 milyard avro əməliyyat zərəri olduğunu bildirib.

Avtosfer.az xəbər verir ki, bu barədə "Volkswagen" qrupu öz maliyyə nəticələrində bildirib.

"Audi", "Bugatti", "Seat", "Skoda" və "Porsche" brendlərini özündə birləşdirən "Volkswagen" qrupu iyul-sentyabr ayları ərzində 5,9 milyard avro əməliyyat zərəri bildirib.

Analitiklər ötən ildə qeydə alınan 1,3 milyard avro zərərdən sonra bu rübdə 2,6 milyard avro zərər proqnozlaşdırmışdılar.

Maliyyə hesabatlarının kəskin şəkildə azalmasının əsas səbəblərindən biri "Porsche"nin dəyərinin azalmasıdır. Şirkət "Porsche"nin brend dəyərində 6,4 milyard avro azalma qeydə alıb ki, bu da əməliyyat mənfəətinə birbaşa təsir edib.