![İcazə verilən saatlarda avtobus zolağından istifadə edən sürücülər niyə cərimələnir? - AÇIQLAMA](/upload/news/small/1962616.jpg)
20 ildir fəaliyyət göstərən kafeyə səkini kim satıb? - FOTO
![20 ildir fəaliyyət göstərən kafeyə səkini kim satıb? - FOTO](/upload/news/1468179.jpg)
Paytaxtda səki zəbtinə dövlət qurumları göz yumur.
Avtosfer.az xəbər verir ki, Bakının Nizami rayonunda səki 20 ilə yaxın müddətdir fəliyyət göstərən kafe tərəfindən zəbt edilir və həmin kafeyə gözüm üstdə qaşın var deyən yoxdur.
Belə ki, rayonun Qara Qarayev prospektində, “Neftçilər” metro stansiyasından “Qara Qarayev” metro stansiyasına gedən yolda böyük bir əraziyə sahib “Təbiət” kafesinin sahibinin gözü doymayıb. Kafenin ərazisini genişləndirmək məqsədilə səkinin böyük bir hissəsini şəxsi mülkünə çevirib. Məsələ ondadır ki, obyekt bu addımı atarkən qanunsuzluğa gözünü yuman Nizami Rayon İcra Hakimiyyəti ilə birlikdə Azərbaycan Avtomobil Yolları Dövlət Agentliyi də prospektin həmin hissəsində bir neçə il apardıqları təmir işləri zamanı kafenin özbaşınalığına heç bir reaksiya verməyib.
Məsələ ilə əlaqədar Nizami Rayon İcra Hakimiyyəti ilə əlaqə saxladıq. Qurumun sektor müdiri Cavid Qafarov sorğumuza cavab olaraq bildirdi ki, icra hakimiyyətinin özəl mülkiyyətçinin əmlakını, onun hansısa hissəsini sökmək səlahiyyəti yoxdur.
Mövzu ilə bağlı Azərbaycan Avtomobil Yolları Dövlət Agentliyindən açıqlama almağa çalışsaq da, nə agentliyin daxili nömrələrinə, nə də mətbuat xidmətinin nömrəsinə cavab verən olmadı.
Ərazinin fotosu sosial şəbəkələrdə müzakirələrə səbəb olub və istifadəçilər kinayə ilə bildirib ki, həmin səkidə əhalinin məhz təhlükəyə atılması üçün hər addım atılıb. Sakinlər aidiyyəti qurumların yaranan vəziyyəti tezliklə düzəltməyini gözlədiklərini vurğulayıb.
Səfər