“Bazarstore” istehlakçıların hüquqlarını pozdu, 6 min cərimələndi

“Bazarstore” MMC istehlakçıların hüquqlarını pozduğu üçün cərimələnib. 

Avtosfer.az-ın əldə etdiyi məlumata görə, müvafiq qurum tərəfindən şirkət barəsində İnzibati Xətalar Məcəlləsinin 447.0.1-cü maddəsinə əsasən 6 min manat məbləğində cərimə protokolu tərtib edilib.

Daha sonra protokol baxılması üçün Xətai Rayon Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb.  

Hakim Bəxtiyar Məmmədovun sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.

Qeyd edək ki, sözügedən protokolun tərtib olunduğu maddə istehlakçıların hüquqlarının pozulması, mal satan və ya əhaliyə xidmət göstərən şəxslər tərəfindən malın (xidmətin) ölçüsünə, çəkisinə, hesabına, habelə istehlak xüsusiyyətinə və ya keyfiyyətinə dair istehlakçıların az miqdarda aldadılmasına görə məsuliyyəti nəzərdə tutur. İstehlakçıların hüquqlarının pozulmasına görə fiziki şəxslər 150 manatdan 500 manatadək məbləğdə, vəzifəli şəxslər 1500 manatdan 2000 manatadək məbləğdə, hüquqi şəxslər 4000 manatdan 6000 manatadək məbləğdə cərimə edilir.

Xatırladaq ki, "Bazarstore" 1999-cu ildə yaradılıb. Nizamnamə kapitalı 40 862 223.16 ABŞ dolları olan MMC-nin qanuni təmsilçisi Burhan Sevahildir.