İspaniya sərnişinləri hantavirusa yoluxan gəmini qəbul etməyə razılaşdı

İspaniya rəhbərliyi göyərtəsində hantavirus infeksiyası yayılan Niderlanda məxsus "MV Hondius" kruiz gəmisinin Kanar adalarındakı limanlardan birinə yan almasına razılıq verib.

Avtosfer.az xəbər verir ki, bu barədə "El Confidencial" məlumat yayıb.

Bildirilir ki, rəsmi Madrid buna dair Ümumdünya Səhiyyə Təşkilatının (ÜST) Avropa İttifaqı ilə öncədən razılaşdırılmış müraciətini qəbul edib. Hazırda sözügedən gəmi Kabo-Verde adası yaxınlığında dayanıb.

Kruiz gəmisi hərəkətə başlamamışdan öncə Avropa Xəstəliklərə Nəzarət və Profilaktika Mərkəzinin (ECDC) ekspertləri mövcud durumu analiz edəcəklər. Mütəxəssislər gəmidəki şəxslərin Kabo-Verdedən təxirəsalınmaz təxliyəsinə ehtiyac olub-olmadığını dəqiqləşdirməlidirlər. Digər heyət üzvləri və sərnişinlər isə Kanar adalarına doğru hərəkət edəcəklər. Üç-dörd gün çəkəcəyi ehtimal olunan bu proses üçün dəqiq hansı limanın seçildiyi hələlik açıqlanmayıb.

Gəmi İspaniya sahillərinə çatdıqdan dərhal sonra göyərtədə olan bütün şəxslər tibbi yoxlanışa cəlb olunacaqlar. Tibb işçiləri zərərçəkənlərə müvafiq köməklik göstərəcəklər, ardınca isə sərnişin və heyət üzvlərinin öz ölkələrinə repatriasiyası təmin ediləcək.