Lombarda ödənişləri etsə də, qızılını geri ala bilmir - VİDEO

Qızıl girov qoyaraq kredit götürüb və ödənişlərini vaxtında tamamlasa da, artıq 2 ildir nə qızılını geri ala bilir, nə də qızılının pulunu.

Avtosfer.az xəbər verir ki, Bərdə rayonu Qaradağlı kəndində yaşayan Vidadi Nəcəfquliyev Xəzər Tv-yə bildirib ki, torpaq alıb ev tikdirmək üçün ailəsinin qızıllarını lombarda qoyaraq kredit götürüb.O, aylıq ödənişlərini tam ödədiyini desə də, artıq iki ildir qızıllarını geri ala bilmədiyini iddia edir.

Şikayətçinin sözlərinə görə, kredit təşkilatının nümayəndəsi Büllurə Əlizadə ilə dəfələrlə əlaqə saxlamağa çalışsalar da, müxtəlif bəhanələrlə qarşılaşıblar. Ailə iddia edir ki, telefon zənglərinə cavab verilməsə də, WhatsApp vasitəsilə göndərilən mesajlarda qızılların tezliklə qaytarılacağı bildirilib.

 Vidadi Nəcəfquliyevin oğlu Baloğlan Nəcəfquluzadənin sözlərinə görə, lombarda məsul heç bir şəxslə əlaqə saxlaya bilmirlər.

 Hazırda qızılların girov qoyulduğu lombardın fəaliyyətini dayandırdığı bildirilir. Şikayətdə adı çəkilən şəxslərlə isə əlaqə saxlamaq mümkün olmadı. Zərərçəkənlər məsələ ilə bağlı aidiyyəti üzrə hüquq-mühafizə orqanlarına müraciət edəcəklərini deyirlər.