Novxanı çimərliyində sürücülərə qarşı "xəndək" maneəsi - VİDEO

Novxanı çimərliyində vətəndaşların sahilə sərbəst girişini məhdudlaşdıran addım sosial şəbəkələrdə ciddi narazılığa səbəb olub.

Avtosfer.az xəbər verir ki, bu barədə görüntülər sosial şəbəkələrdə yayılıb.

Çimərlik ərazisindən paylaşılan video görüntülərdə sahil boyu uzun və dərin xəndəklərin qazıldığı əks olunub.

​Görüntüləri çəkən vətəndaş bildirir ki, bu xəndəklər avtomobillərin dəniz kənarına yaxınlaşmasının qarşısını almaq üçün qəsdən qazılıb. Onun sözlərinə görə, bu addımın arxasında çimərlikdə fəaliyyət göstərən pullu obyektlərin və “besetkaların” (söhbətkahların) kommersiya maraqları dayanır. Sürücülər məcburən avtomobillərini uzaqda saxlamalı və ərazidəki pullu xidmətlərdən istifadə etməli olurlar.

​“Bəlkə bir insanın imkanı yoxdur? Niyə hamı mütləq buradakı obyektlərdə oturub yemək yeməlidir? İnsanlar var ki, sadəcə özü ilə bir termos çay gətirib dəniz kənarında oturmaq istəyir. Bu qazılanlar qanunidirmi? Buna kim nəzarət edir?” – deyə şikayətçi vurğulayıb./BAKU.WS