Polis postuna kamikadze hücumu edildi – 15 asayiş keşikçisi öldü

Şənbə günü Pakistanın Xayber-Paxtunxva əyalətinin Bannu dairəsindəki polis postuna kamikadze tərəfindən edilən hücum nəticəsində azı 15 polis həlak olub.

Avtosfer.az "Report"a istinadən xəbər verir ki, bu barədə "Dawn" qəzeti məlumat yayıb.

Dairə polisinin əməkdaşı Səccad Xanın sözlərinə görə, hücum zamanı postdakı 18 polisdən 15-i həlak olub, üçü isə yaralanıb.

"Xilasetmə əməliyyatı başa çatıb. Dağıntılar altından on beş nəfərin cəsədi və üç yaralı çıxarılıb", - 112 təcili yardım xidmətindən bildirilib.

Qeyd olunub ki, hücum zamanı yaraqlılar kvadrokopterlərdən və ağır silahlardan istifadə ediblər. Yaxınlıqdakı binalara da partlayış nəticəsində ciddi ziyan dəyib.

Pakistanın daxili işlər naziri Möhsin Naqvi faciəvi hadisədən dərin kədər hissi keçirdiyini bildirib.

"Öz ölkəsinin bu cəsur oğulları Pakistan xalqını və bütün dünyada sülhü qoruyarkən canlarından keçiblər. Onların cəsarəti, işinə sadiqliyi və fədakarlığı heç vaxt unudulmayacaq... Pakistan terrorizmə qarşı vahid cəbhədə mübarizə aparır və bu cür qorxaq hərəkətlər bizim qətiyyətimizi heç vaxt zəiflətməyəcək", - o, "X" sosial şəbəkəsində yazıb.

Baş nazir Şahbaz Şərif bildirib ki, hakimiyyət terrorizmlə mübarizədə regiona bütün mümkün köməkliyi göstərəcək.

"Hökumət ölkədə terrorizmin bütün formalarının kökünü kəsmək əzmindədir", - deyə Şərif vurğulayıb.

***

Pakistanın şimal-qərbində polis postunun yaxınlığında baş vermiş terror aktı nəticəsində həlak olan hüquq-mühafizə orqanları əməkdaşlarının sayı 12-yə çatıb.

Bu barədə yerli polisə istinadən AFP məlumat yayıb.

Qeyd edək ki, hücum Əfqanıstan sərhədinin yaxınlığında yerləşən Xayber-Paxtunxva əyalətinin Bannu şəhərində baş verib.

Hücum intiharçı terrorçunun minalanmış avtomobili posta çırpması ilə başlayıb. Partlayışdan sonra əraziyə soxulan bir qrup silahlı şiddətli atəş açıb. Agentliyin mənbələrinin məlumatına görə, hücum edənlər təkcə ağır silahlardan deyil, həm də PUA-lardan istifadə ediblər.

Toqquşmadan sonra yaraqlılar silah və bir neçə polis əməkdaşını özləri ilə apararaq geri çəkiliblər. Hazırda rəsmi olaraq bir nəfər itkin düşmüş hesab olunur.

Qeyd olunub ki, son vaxtlar Xayber-Paxtunxva regionunda terror hücumları halları çoxalıb. İslamabad Kabili ekstremistləri dəstəkləməkdə ittiham edir, lakin "Taliban" rəhbərliyi bu ittihamları rədd edir.