“UĞUR 777 estetik mərkəz”dəki qanun pozuntusu ilə bağlı məhkəmə başladı

Bakıda fəaliyyət göstərən “UĞUR 777 estetik mərkəz”də yol verilən qanunsuzluqlara təqsirləndirilən şəxslər -  Murad Bağırov, Rəsmiyyə Quliyeva və Xəyalə İsmayılovanın cinayət işi üzrə məhkəməsi başlayıb.

Avtosfer.az unikal-a istinadən xəbər verir ki, Bakı Ağır Cinayətıər Məhkəməsinin hakimi Fəxri Məmmədovun sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib. 

Dövlət ittihamçısı Babaxan Həsənəliyev işin baxışa verilməsini və təqsirləndirilən şəxslərin həbs-qətimkan tədbirinin dəyişdirilmədən saxlanılmasını təklif edib. 

Məhkəmə müşavirəyə gedib qayıtdıqdan sonra qərarı elan edib. 

Qərara əsasən, cinayət işi məhkəmə baxışına verilib və onlar barəsində seçilmiş həbs qətimkan tədbiri dəyişdirilmədən saxlanılıb. 

Məhkəmə baxışı mayın 25-ə təyin edilib.

Qeyd edək ki, bir qrup şəxs tərəfindən qanunsuz olaraq estetik əməliyyatların aparılması barədə mediada yayılan məlumat və videogörüntülər əsasında Baş Prokurorluğun Cinayət təqibindən kənar icraatlar idarəsində araşdırma aparılıb.

Araşdırma zamanı Xəyalə İsmayılovanın adına dövlət qeydiyyatına alınan, “UĞUR 777 estetik mərkəz”in qanunsuz fəaliyyət göstərməsi, orada müvafiq standartlara riayət edilmədən tibbi prosedur adı altında müxtəlif estetik əməliyyat və kosmetoloji prosedurların icra olunması nəticəsində xəstəliklərin yayılmasına əsaslı şübhələr müəyyən edilib.

Həmçinin sözügedən mərkəzdə özlərini həkim-kosmetoloq kimi təqdim edən Xəyalə İsmayılova, Murad Bağırov, Firuzə Əliyeva, Gülbədə Abdullayeva, Zairə Salmanova və digərləri tərəfindən ayrı-ayrı şəxslərin bədən nahiyələrində icra olunan estetik cərrahi əməliyyatlar nəticəsində onların sağlamlığına ağır xəsarət yetirilməsinə əsaslı şübhələr müəyyən edilib.

Araşdırmalar nəticəsində o da aşkarlanıb ki, Xəyalə İsmayılova, Murad Bağırov, Firuzə Əliyeva, Gülbədə Abdullayeva, Zairə Salmanova və digərlərinin müvafiq ali və ya orta ixtisas tibbi təhsili, habelə “Praktik tibb fəaliyyəti ilə məşğul olmaq hüququnu təsdiq edən sertifikasiya şəhadətnaməsi” yoxdur. 

Xəyalə İsmayılova, Murad Bağırov, Rəsmiyyə Quliyeva və Xəyalə İsmayılovanın Cinayət Məcəlləsinin 131.2 (ehtiyatsızlıqdan sağlamlığa ağır zərər vurma), 309.2 (ağır nəticələrə səbəb olan vəzifə səlahiyyətlərini aşma), 314.2-ci  (ağır nəticələrə səbəb olan səhlənkarlıq) və digər maddələri ilə ittiham irəli sürülüb.