40 illik nəhəng gəmini pulsuz verdilər - FOTOLAR

İtaliya donanmasında təxminən 40 il xidmət edən “Giuseppe Garibaldi” təyyarədaşıyan gəmisini heç bir ödəniş almadan İndoneziyaya təhvil verib.

Avtosfer.az xəbər verir ki, İndoneziya Hərbi Dəniz Qüvvələrinə qoşulacaq gəmi “KRI Sriwijaya” adlandırılacaq.

Onun, əsasən, təbii fəlakətlərə cavab və humanitar yardım əməliyyatlarında, zərurət yaranacağı təqdirdə isə hərbi missiyalarda istifadə edilməsi planlaşdırılır.

1985-ci ildə İtaliya Hərbi Dəniz Qüvvələrinin xidmətinə daxil olan gəmi təxminən 40 il ərzində müxtəlif missiyalarda iştirak edib. İtaliyadan ayrıldıqdan sonra Süveyş kanalından keçərək Misir və Şri-Lanka istiqamətindən Cənub-Şərqi Asiyaya çatıb. İndoneziyanın ərazi sularına daxil olduqdan sonra iki freqat tərəfindən qarşılanaraq Cakartaya müşayiət edilib.

İndoneziya Hərbi Dəniz Qüvvələrinin komandanı Məhəmməd Əli gəminin yaşına baxmayaraq, daha uzun müddət istifadə edilə biləcəyini bildirib. Onun sözlərinə görə, “KRI Sriwijaya”nın daha 15-20 il aktiv xidmət göstərməsi mümkündür.

İndoneziya donanması gəmidə xidmət edəcək heyətin hazırlığına da başlayıb. İlk mərhələdə 310 nəfərin təlim keçməsi planlaşdırılır.

Gəminin əsas xüsusiyyətlərindən biri geniş hava əməliyyatları imkanlarıdır. Missiyanın konfiqurasiyasından asılı olaraq, “KRI Sriwijaya”nın 14 və ya daha çox helikopter daşıya biləcəyi bildirilir. Bu imkan gəmidən təbii fəlakətlər zamanı personal və avadanlıqların daşınması üçün də istifadə etməyə şərait yaradacaq.

“Giuseppe Garibaldi”nin İndoneziya Hərbi Dəniz Qüvvələrinə qoşulması ölkənin dəniz qüvvələri üçün tarixi hadisə hesab olunur. Gəmi İndoneziyanın ilk təyyarədaşıyan sinif platforması olacaq.

Beləliklə, İndoneziya Cənub-Şərqi Asiyada Taylanddan sonra təyyarədaşıyan gəmiyə sahib olan ikinci ölkəyə çevriləcək.

Gəminin yeni adı olan “Sriwijaya” isə əsrlər boyu Cənub-Şərqi Asiyanın mühüm dəniz güclərindən biri olmuş, Sumatrada yerləşən Srivijaya Krallığının adından götürülüb.