Yol polisi sürücünü saxlamaq üçün məhəlləyə girə bilər? - VİDEO

Son vaxtlar yol polisi əməkdaşlarının xidməti ilə bağlı sürücülər redaksiyamızın qaynar xəttinə çoxsaylı suallar ünvanlayırlar. Avtosfer.az xəbər verir ki, bu suallar əsasən bölgələrdən gəlir və sürücüləri narahat edən əsas məqam yol polisi əməkdaşlarının dislokasiyası ilə bağlıdır. Sürücülər tez-tez belə bir sual verirlər: Yol polisi qayda pozan sürücünün arxasınca kənd yollarına və ya məhəlləarası yollara daxil ola bilərmi?

Sürücülərə qaranlıq qalan bu məsələyə aydınlıq gətirmək üçün bildiririk ki, yol polisi əməkdaşlarının xidməti "Yol Patrul Xidməti" haqqında təlimatla tənzimlənir. Həmin təlimatda yol polisi əməkdaşlarının kənd və məhəlləarası yollarda xidmət aparmasını qadağan edən hər hansı bir müddəa nəzərdə tutulmayıb. Bu o deməkdir ki, yol polisi əməkdaşı qayda pozan sürücünü məsuliyyətə cəlb etmək məqsədilə ümumi istifadədə olan istənilən yol sahəsinə daxil ola bilər.

Qanunvericiliyə əsasən, sürücü qayda pozuntusuna yol verdikdə, yol polisi əməkdaşı həmin sürücünü saxlayaraq inzibati məsuliyyətə cəlb edə bilər.

Bu səbəbdən, sürücülər bilməlidirlər ki, yol polisi yalnız əsas magistral və şəhər yollarında deyil, ümumi istifadədə olan hər bir yolda xidmət göstərə bilər. Belə hallarda sürücülərin polis əməkdaşlarının qanuni tələblərinə riayət etməsi və hərəkət qaydalarına uyğun davranması vacibdir.

Nərmin