Bu maşınların arxasınca sürməyə və yol verməməyə görə cərimə oluna bilərsiniz

Bəzən sürücülər keçid üstünlüyü olan operativ nəqliyyat vasitələrinə yol vermir və ya onlara qoşularaq hərəkət edir. Yəni, təcili yardım maşını hərəkət edən zaman bəzi sürücülər yolun boşluğundan istifadə edərək onun ardınca gedir. Amma əslində bunun qayda pozuntusu olmasını bəlkə də bir çox sürücülər bilmir. Avtosfer.az-ın məlumatına görə, İnzibati Xətalar Məcəlləsinin 331-ci maddəsində qeyd olunur ki, xüsusi səs, qırmızı və ya göy sayrışan işıq siqnalı verən, keçid üstünlüyü hüququna malik olan nəqliyyat vasitələrinə yol verilməməsinə və ya belə nəqliyyat vasitəsinin müşayiət etdiyi mütəşəkkil nəqliyyat dəstəsinə qoşularaq hərəkət edilməsinə görə sürücü yüz manat məbləğində cərimə edilir.

Burada söhbət operativ nəqliyyat vasitələrindən gedir. Polis, yanğınsöndürən və təcili yardım maşınları bu kateqoriyaya aiddir. Polis maşınların arxasınca getmək çox nadir hallarda baş verə bilər. Sürücülərin əksəriyyəti buna risk etməz. Çünki cəriməni elə polis yazır. Yanğınsöndürən maşınların arxasınca da nadir hallarda hərəkət edirlər. Çünki onların qabariti böyükdür və sürəti aşağı olur. Təcili yardıma daha çox rast gəlinir yollarımzda. Elə buna görə də yalandan qəza işıqlarını yandırıb təcili yardım maşının arxasınca gedənlər çoxdur. Yəni, bu cür nəqliyyat vasitələrinin arxasınca getmək də məsuliyyət yaradır. Təcili yardım maşını tək hərəkət edir. Amma polis və yanğınsöndürən maşınlar iki və daha çox nəqliyyat vasitəsindən ibarət olur. Bu səbəbdən də polis və yanğınsöndürən maşınların qarşısına çıxmaq, onlara qoşulub hərəkət etmək birbaşa məsuliyyət yaradır - 100 manat 3 bal. Təcili yardımın arxasınca getməyə görə cərimə isə bir qədər mübahisəli məsələdir. Amma ona yol verməməyə görə 100 manat 3 bal cərimə yazıla bilər.

Odur ki, bu addımı atmazdan qabaq bir daha fikirləşin...

Orxan