Qaxda narkomaniyanın zərərləri ilə bağlı maarifləndirici tədbir keçirilib - FOTO

Qaxda narkomaniyanın zərərləri ilə bağlı maarifləndirici tədbir keçirilib
Yeniyetmə və gəncləri zərərli vərdişlərin fəsadları barədə məlumatlandırmaq, onlar arasında sağlam həyat tərzini təbliğ etmək məqsədilə Qax Rayon Polis Şöbəsinin təşkilatçılığı ilə  Ləkit kənd tam orta məktəbində “Narkomaniyaya yox deyək” mövzusunda növbəti maarifləndirici tədbir keçirilib. 
Tədbirdə çıxış edən rayon polis şöbəsinin rəisi, polis polkovniki Vidadi Qurbanov narkomaniyanın cəmiyyət üçün təhlükə mənbəyi olduğunu diqqətə çatdıraraq, bu bəlaya qarşı ölkəmizdə aparılan mübarizədən, qəbul olunan dövlət proqramlarından danışıb, eləcə “ağ ölüm”ün zərərləri ilə bağlı təhsil müəssisələrində keçirilən genişmiqyaslı maarifləndirici tədbirlərin əhəmiyyətini vurğulayıb. V.Qurbanov məktəblilərə gələcək həyatlarında da narkotik vasitələrdən uzaq olmalarını, təhsilə, idmana maraq göstərmələrini tövsiyə edib.
Daha sonra mövzu ətrafında şagirdlərin sualları cavablandırılıb və narkomaniyanın fəsadlarını əks etdirən videoçarx nümayiş olunub.