Şuşada "Azərbaycan əsgəri, səninləyik" sosial aksiyası təşkil olunub - VİDEO

"ASAN xidmət"in və Daxili İşlər Nazirliyinin Daxili Qoşunlarının birgə təşkilatçılığı, "ASAN Könüllüləri" Təşkilatının dəstəyi ilə "Azərbaycan əsgəri, səninləyik" sosial aksiyası təşkil olunub. 12 Mart - Daxili Qoşunlar Günü ilə əlaqədar təşkil olunan tədbir işğaldan azad olunmuş Şuşa şəhərində baş tutub. Sosial aksiyada Şuşa şəhərinin müxtəlif ərazilərində xidmət çəkən Daxili Qoşunların şəxsi heyətinə "ASAN Könüllüləri" Təşkilatının “Əsgərə məktub” layihəsi çərçivəsində vətəndaşlarımız tərəfindən ünvanlanmış məktublar çatdırılıb. Tədbirdə müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələri tərəfindən 44 günlük Vətən müharibəsində əldə edilmiş parlaq qələbədən söz açılıb, şəhidlərimizin əziz xatirəsi ehtiramla yad edilib. Bu il 30 illik yubileyini qeyd edən Daxili Qoşunların şəxsi heyətinin ölkəmizin suverenliyi və ərazi bütövlüyü uğrunda, o cümlədən Vətən müharibəsindəki döyüş yolundan söz açılıb. "Azərbaycan əsgəri, səninləyik" sosial aksiyasının məqsədi Azərbaycan Silahlı Qüvvələrinə vətəndaşlarımızın daimi dəstəyini, etibar və inam hissini nümayiş etdirməkdir.