Alman avtomobil nəhənginin xalis mənfəəti - 6 dəfəyə yaxın azalıb

Almaniyanın avtomobil istehsalçısı olan “Bayerische Motoren Werke AG” (BMW) konserni cari ilin ilk yarısının nəticələrinə görə 362 milyon avro həcmində xalis mənfəət əldə edib.

Finans.az xarici KİV-ə istinadən xəbər verir ki, bu, ötən ilin analoji dövrünün göstəricisindən 5,7 dəfə azdır. Şirkətin gəlirləri hesabat dövründə 10,3% azalaraq 43,225 milyard avro təşkil edib.

Qeyd edilir ki, bu ilin yanvar-iyun aylarında “BMW” markasından olan avtomobillərin satışı 842 min ədədə (21,7% azalıb), “Mini” - 118,9 min ədədə (-31,1%) və “Rolls-Royce” - 2,56 min ədədə (-37,6%) düşüb.

Xatırladaq ki, mənzil-qərargahı Münhendə yerləşən “BMW” avtomobil konserni “BMW”, “Mini” və “Rolls-Royce” markalı avtomobillərin, motosikletlərin, həmçinin mühərriklərin istehsalı üzrə ixtisaslaşıb.