Lamborghini yeni superkar hazırlayıb - FOTO

Lamborghini şirkəti V10 atmosfer mühərriki ilə təchiz edilmiş yeni superkarı təqdim edəcəyini bildirib. Dərc edilmiş tizerdəki məlumata əsasən, 18 noyabr tarixində Sant'Aqata Bolonyeze şirkəti Huracan Super Trofeo Omologato (STO) arxa ötürməli "trek" superkarını təqdim edəcəkdir. STO indeksli superkar Performante modelini əvəzləyəcəkdir.

Lamborghini pərəstişkarları, Huracan STO modelinin debütünü bir il yarımdır ki gözləyirlər. Xatırladaq ki, ekstremal superkarın prototipin ilk dəfə keçən ilin mart ayının ortalarında casuslara rast gəlmişdilər. Yeni superkar arxa ötürməli Huracan EVO modelindən orijinal kuzov dəsti, iri arxa antiqanadı və karbon lifi ilə yüngülləşdirilən kuzovu ilə fərqlənəcəkdir.

İlkin məlumatlara görə, Huracan STO modeli Huracan EVO superkarından 150 kiloqram yüngül olacaq və xüsusi şassi tənzimlənməsi və daha səmərəli əyləc sistemini alacaqdır. Kapotun altında 5.2-litrlik V10 qalacaqdır. Güc qurğusunun tam ötürməli Performante versiyasında olduğu kimi, 640 at qüvvəsi və 600 Nm fırlanma anı hasil edəcəyi ehtimal edilir. Yarış Huracan Super Trofeo modelindən fərqli olaraq, STO kupesinin ümumi yollara çıxışı olacaqdır.

Huracan STO modeli 700 ədəddən ibarət məhdud saylı tirajla buraxılacağı deyilir. Yeni Lamborghini ilə bağlı bütün detallar 18 noyabr tarixində açıqlanacaqdır.