Tesla Model X avtomobili 90 saniyə ərzində Bluetooth bağlantısı vasitəsilə ələ keçirildi

Son günlərdə səhmləri rekord səviyyəyə çatan Tesla, simsiz proqram yeniləmə sistemi ilə çox populyardır. 

Avtomobillərdə avtomatik olaraq kodlar təqdim edən sistem ötən günlərdə təhlükəsizlik testi edilib.

TED.az-ın məlumatına görə, Belçika Leuven Universitetinin təhlükəsizlik üzrə tədqiqatçısı Lennert Wouters, iki dəqiqədən az bir müddətdə Teslanın Model X markalı avtomobilini ələ keçirməyi bacarıb. Üstəlik bunun üçün o, bahalı cihaza ehtiyac duymayıb.

Lennert Wouters Tesla Model X avtomobillərindəki Key Fob açarında qüsur aşkar edib. Tədqiqatçı, bu boşluq sayəsində vasitənin eyniləşdirmə nömrəsini öyrənən və sahibinin açarına 5 metrə yaxınlaşmağı bacaran hər kəsin avtomobili ələ keçirə biləcəyini bildirir.

Avtomobili ələ keçirmək üçün lazım olan yeganə xarici avadanlıq, qiyməti 300 dollar olan Bluetooth-a qoşulmuş cihazdır. Çantaya asanlıqla yerləşdirilə bilən bu cihazı telefondan idarə etmək olur. Bütün şərtlər yerinə yetirildikdə cihaz Model X-in kilidini açan radio kodu 90 saniyə ərzində aşkarlaya bilir.