Yeni nəsil "Kia Sportage" modelinin şəkilləri peyda olub - FOTO

Yeni Kia Sportage modelinin təqdimatı Çində keçirilməli olan Quançjou avtosalonunda baş tutmalıdır. Lakin debütdən öncə, İnternetdə yeni krossoverin kamuflyajsız şəkilləri peyda olub - Autohome.com.cn portalı tərəfindən yayımlanan şəkillər təqdimata hazırlıq zamanı çəkilib.

Beşinci nəsil Kia Sportage modeli 2020-ci ilin birinci yarısında təqdim edilməli idi, lakin sonradan istehsalçı avtomobilin dünyəvi təqdimatını 2021-ci ilin yazına qədər təxirə saldı. Eyni zamanda, Kia Sportage modelinin Çin bazarı üçün nəzərdə tutulan versiyası 22 noyabrda nümayiş olunacaqdır. Qlobal Sportage modelindən fərqlənən krossover fərqli ada malikdir - Sportage Ace.

Kia Sportage Ace modeli 40 millimetr artırılmış uzunluğa, yeni Sorento modelinin üslubunda hazırlanmış tamamilə yeni radiator barmaqlığına və işıq texnikasına sahib olub. Arxa fənərlər indi düzbucaqlıdır və bir cüt paralel şaquli zolaqlara malikdirlər. Bundan əlavə, kandar və bamperlərdə narıncı rəngli dekorativ elementlər peyda olub.

Sportage Ace modelinin qlobal versiyasının 200 at qüvvəli 1,5-litrlik turbomühərriklə təchiz olunacağı gözlənilir. Yeni modelin dinamik xüsusiyyətlər hələ açıqlanmayıb. Yeni krossoverin təchizatına zəngin elektron köməkçilər dəsti, 10.25-düymlük virtual cihazlar paneli və yeddi düymlük ekranı olan multimedia sistemi daxil ediləcəkdir.

Yeni Kia Sportage modelinin istehsalı Dongfeng-Kia ortaq müəssisəsində təşkil ediləcəkdir.

Kia Sportage modelinin qlobal versiyasına gəlincə, bu versiya platforma və mühərrik çeşidini yeni Hyundai Tucson modeli ilə bölüşəcək və Çin versiyasına nisbətən bir qədər yuvarlaq dizayna sahib olacaqdır. Kia nümayəndələri krossoverin pərəstişkarlarını koreya markası üçün xarakterik olmayan eksteryer dizaynı ilə təəccübləndirəcəyini vəd edir. (autograph.az)