AZAL Bakıdan Pekinə birbaşa reys həyata keçirib - FOTO

“Azərbaycan Hava Yolları” QSC (AZAL) Bakıdan Çinin paytaxtı Pekinə birbaşa reys həyata keçirib.

Avtosfer.az xəbər verir ki, bu barədə AZAL məlumat yayıb.

Məlumata görə, təyyarə dekabrın 19-da, saat 19:40-da Bakıdan qalxıb və dekabrın 20-də yerli vaxtla saat 06:50-də Pekində enib. Reysin təntənəli qarşılanma mərasimində aviaşirkətin nümayəndələri, Azərbaycanın və Çinin diplomatları, qonaqlar, o cümlədən Azərbaycanın Çindəki səfiri Bünyad Hüseynov iştirak ediblər.

Bakı-Pekin-Bakı marşrutu üzrə uçuşlar həftədə iki dəfə çərşənbə axşamı və bazar günləri yerinə yetiriləcək. Aviabiletləri aviaşirkətin rəsmi www.azal.az saytından, mobil tətbiqindən, AZAL-ın kassalarından və ya akkreditə olunmuş agentliklərindən əldə etmək mümkündür.