"BMW"-nin zirehli elektromobili üzə çıxdı – DÜNYADA İLK - FOTO

İlk baxışda adama elə gəlir ki, bu, BMW-nin 7-ci seriyasından olan avtomobildir. Fərqi hiss etmək üçün təkərlərə və şüşəyə diqqət etmək lazımdır. 

Avtosfer.az-ın xəbərinə görə, BMW i7 Protection yalnız xarici görünüşünə görə standart 7-ci seriyaya bənzəyir. Reallıqda isə söhbət zirehli elektromobildən gedir. Almaniyanın Dinqolfinq şəhərində istehsal olunan model dünyada ilk zirehli elektromobil hesab edilir. 

Avtomobilin karkası və şüşələri 7,62 mm-lik zirehdələn gülləyə davam gətirir. İstehsalçı bildirir ki, xüsusi emal keçmiş poladdan hazırlanmış kuzov hava hücumu, qumbara və ya mina partlayışına davam gətirir.  

Təkərlər tam boşalsa belə, maşını 80 km/saat sürətlə idarə etmək mümkündür.

Əsas məsələ maşının elektrik mühərriki ilə hərəkətə gətirilməsidir. 544 at gücü mühərrik maşının sürətini 9 saniyəyə 100 km/saata çatdırır. Benzin mühərrikinin olmaması avtomobilin hücum zamanı yanma riskini, həmçinin zirehli maşınlara xas olan qızmanı da istisna edir. 

Avropa bazarı üçün nəzərdə tutulan avtomobilin qiyməti açıqlanmır.

Vüqar