"Səhv düşəndə yerimiz" və ya şüursuz kimdir? - FOTO

Mərhum şairimiz Qabilin bu misralarını elə-belə xatırlamadım. Bəzən elə hadisələrlə rastlaşırıq ki, ən gözəl ifadə tərzi elə bu misradır. Qurani-Kərimdə buyrulur ki, bəzi insanlar mələkdən də üstün, bəziləri isə heyvandan da aşağı ola bilir. Qeyd edək ki, mələklərin günahsız və qüsursuz olduğuna inanılır.
Bu gün səhər sosial şəbəkələrdə qarşıma çıxan mənzərə məni bu sətirləri yazmağa vadar etdi. Deməli 28 May qəsəbəsində magistral yolun üzərində səliqəli bir piyada keçidi var. Bu da qarşı tərəfə təhlükəsiz şəkildə keçmək üçün tikilib. Təbii ki, normal insan öz təhlükəsizliyini düşünərək piyada keçidindən istifadə edər. Amma bəzən ölümə tələsənlər piyada keçidinin 100-200 metrliyindən yolu keçməyə cəhd edirlər. Gördüyüm foto isə tamamilə fərqli bir mənzərədir. İt yuxarıda piyada keçidindən istifadə edərək yolu keçir. İki nəfər isə düz keçidin altından qarşı tərəfə qaçaraq keçməyə cəhd edirlər. İndi bu mənzərəyə nə deyək? Hansı adı qoyaq ki, uyğun olsun? Şüursuz dediyimiz heyvan, şüurlu hesab etdiyimiz insan?
Mən çətinlik çəkdim, bəlkə siz kömək edəsiniz.

Orxan Əli
Avtosfer.az saytının redaktoru