DYP sürücüləri çaşdıran dairədəki vəziyyəti nəzarətə götürdü - Həll olunacaq - VİDEO

DİN-in Mətbuat Xidmətinin Şəki regional qrupunun baş inspektoru, polis kapitanı Mahir Məsimov Avtosfer.az-ın sorğusuna cavab olaraq bildirib ki, polis məsələdən məlumatlıdır, qısa zaman ərzində nöqsanların aradan qaldırılması üçün müvafiq tədbirlər görülür.

***

Qax rayonunda hərəkətin təşkilində olan nöqsan sürücülərin cərimələnməsi ilə nəticələnir. Bu barədə  bir neçə  sürücü Avtosfer.az-ın qaynar xəttinə şikayət ünvanlayıb. Onların sözlərinə görə, yolda dairəvi hərəkəti bildirən 4.3 nişanı var, amma dairə yolun mərkəzində yox, yoldan sağda yerləşir. Asfalt üzərinə çəkilmiş nişanlanma xətti isə olduğu kimi davam etdiyi üçün (dairəyə tərəf meyillənmədiyi üçün) onları çaşdırır. Oradan düzünə hərəkət edən sürücülər yol polisi tərəfindən cərimələnir.

Qeyd edək ki, təcrübəyə əsasən dairənin yoldan sağda və ya solda yerləşməsi mümkün hesab olunur. Lakin hərəkət elə təşkil edilməlidir ki, sürücülər səhv etməsin. Çünki onların səhvi təkcə cərimə ilə yox, bəzən ağır qəza, hətta  ölümlə də nəticələnə bilir.

Bəs hərəkət necə təşkil edilməli idi?

Avtosfer.az-ın məlumatına görə, dairənin girişində zolaqlar təhlükəsizlik adacıqları ilə sağa doğru istiqamətləndirilməlidir ki, avtomobillərin dairəyə daxil olmadan düzünə hərəkət etməsi mümkünsüz olsun. Belə olan halda həm sürücülərə hərəkət istiqaməti aydın olacaq, həm də yolda təhlükə yaranmayacaq. Buna dair fotonu  təqdim edirik:

Nərminə Əli