Bayram günü Bakı-Ələt yolunda oyun çıxaran sürücü CƏZALANDIRILDI - VİDEO

Martın 21-də Avtosfer.az saytında yayımlanmış “Bakı-Ələt yolunda "avtoşluq" edən sürücü bayramı yasa çevirəcəkdi" başlıqlı müraciətlə əlaqədar Baş Dövlət Yol Polisi İdarəsində araşdırma aparılıb. İdarənin rəsmisi, polis polkovnik-leytenantı Mübariz Ağayev Avtosfer.az-a bildirib ki, aparılan araşdırma nəticəsində Bakı-Ələt yolunun 20-ci km-də “VAZ-2107” markalı, 90-XM-830 dövlət qeydiyyat nişanlı avtomobillə yol hərəkəti qaydalarını kobud şəkildə pozaraq təhlükəli manevrlər edən sürücünün Məmmədov Məmməd Möhübbətəli oğlu olması müəyyən edilib. Faktla bağlı inzibati xəta haqqında iş üzrə icraat açılıb və yol verdiyi qayda pozuntusuna görə sürücü M.Məmmədov barəsində qanunamüvafiq inzibati tənbeh tədbiri tətbiq olunub: "Hərəkətdə olan avtomobillə təhlükəli manevrlər edərək özünün və digər hərəkət iştirakçılarının həyat və sağlamlığına biganə münasibət bəslədiyini nümayiş etdirən M.Məmmədovun inzibati tənbehdən nəticə çıxaracağına və bu kimi əməllər törətməyəcəyinə dair verdiyi vədə əməl edəcəyinə ümid edir, bununla yanaşı ictimai qınağa səbəb olan bu halın digər sürücülər tərəfindən təkrarlanmayacağına inanırıq".