DYP tıxaclarla bağlı ali məktəb rektorlarına müraciət edib - FOTO

“Ali təhsil müəssisələrinin qarşısında olan vəziyyət olduqca narahatedicidir”. Bu barədə Avtosfer.az-a Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli deyib. Ali məktəblərin binası qarşısında tıxacların daha çox müşahidə olduğunu bildirən DYP əməkdaşı bunları deyib: "Hər gün sıxlıqlar və tıxaclar müzakirə olunur, bu, başa düşüləndir, amma insan həyatı, sağlamlıq və təhlükəsizlik daha ciddi bir məsələdir. Bu gün ali təhsil müəssisələrinin qarşısında piyada qismində hərəkətdə olan vətəndaşlarımızın yollardakı hərəkətlərinə heç cür haqq qazandırmaq olmaz. Gənc nəslin nümayəndələri - gələcəyin mühəndisləri, həkimləri, müəllimləri yollarda elə mənzərə yaradır ki, biz məktəblilərə, böyüməkdə olan uşaqlara kimi misal çəkək, kimi nümunə göstərək? Bu qayda pozuntuları inzibati məsuliyyət yaratmaqla yanaşı kənardan çox pis görünür və ictimai fikrə mənfi təsir edir. Universitetlərin rəhbərlərindən, təlim tərbiyə işlərini aparan pedaqoji kollektivlərindən artıq dərəcədə xahiş edirik ki, bu məsələləri mahiyyəti üzrə kollektivlərində müzakirə etsinlər, tələbə-gənclər təşkilatlarının gündəliklərinə salsınlar. Bizim cəmiyyətə savadlı mütəxəssis olmaqla yanaşı nizam-intizama hörmətlə yanaşan məsuliyyət hissi yüksək olan cəmiyyət formalaşdırmaq lazımdır. İnanırıq ki, ictimai fəal gənclərimiz əslində çox sadə, lakin həyati əhəmiyyəti olan yol hərəkəti qaydalarının düzgün təbliğatında bizə dəstək olacaqlar. Hər bir gəncimizin yolunun açıq olmasını, heç kimin gəncliyinin yollarda bitməməsini arzu edirik”.