"Əcəmi"də "avtoş"luq edən sürücü tutuldu - 15 gün həbs, 1 il vəsiqədən məhrumetmə - VİDEO

Bakıda avtoxuliqanlıq edən sürücü cəzalandırılıb. Avtosfer.az xəbər verir ki, aprelin 27-də, gecə saat 02:30 radələrində 90-PX-790 dövlət nömrə nişanlı avtomobilin sürücüsü "Əcəmi" metrosu tərəfdən 4-cü mikrorayon dairəsinə daxil olanda avtoşluq edərək asfalt üzərində təkərləri “cüyüldədib”. Onun ardınca digər bir avtomobil də eyni hərəkətləri edib, əks istiqamətə çıxmaqla yanaşı svetoforun qırmızı işığında hərəkət ediblər.

Bakı Şəhər Dövlət Yol Polisi idarəsindən Avtosfer.az-a verilən məlumata görə, həmin nəqliyyat vasitəsinin sürücüsü Süleymanov Elvin Rəşad oğlu iyunun 18-i saxlanılıb. Nəsimi rayonu məhkəməsinin qərarıyla onun barəsində İnzibati Xətalar Məcəlləsinin 511.1.3-cü maddəsinə əsasən bir il müddətinə sürücülük hüququndan məhrumetmə cəzası çıxarılıb. Eyni zamanda sürücü 15 gün inzibati qaydada həbs olunub. 

Nərminə Əli